Saúda do Alcalde

Unha IV edición da “Mostra do Branco Lexítimo” vaise a celebrar en Paderne o primeiro fin de semana de xullo, o sábado día 1 e o domingo día 2.

Esta aposta inicial que o Concello tivo clara como un importante valor para impulsar a economía da zona, conta xa co respaldo de moitos expertos que lle confiren ó Branco Lexítimo un potencial superior a outros de recoñecido prestixio a nivel internacional, aparecendo destacado na Guía Parker e obtendo moitos premios no mundo da enoloxía.

Un fiel defensor do Branco Lexítimo, Luís Paadín, autor da “Guía de vinos, destilados y bodegas”, destaca que son estes os primeiros viños que reciben no medalleiro o “Suma cum laude”, reafirmando así a súa gran calidade.

Coa orixe en Paderne, segundo consta nun documento do profesor García de los Salmones, quen estableceu a comezos do século XX o patrón vitícola de España, esta variedade “Branca Lexítima”, ven a complementarse coas outras castes galegas reforzando así o espectro vinícola da nosa Comunidade coa elaboración de viños de altísima calidade.

Co Branco Lexítimo como eixe central da Mostra, queremos proporcionar ós visitantes motivos de sobra para visitala e, con este fin, elaboramos un programa cargado de actividades para tódolos públicos; un programa ameno e variado que esperamos cumpra as expectativas de todos.

Esperámosvos en Paderne

Benvidos a Paderne